క్రీస్తుయొక్క ప్రియమైన వధువా,

ఈ ఈస్టరు వారాంతమున వధువు ఎటువంటి ఒక మహిమకరమైన సమయమును కలిగియుంటుంది కదా. అది మన జీవితములలో ముఖ్య ఘట్టములలో ఒకటిగా ఉంటుందని; మనమెన్నడూ మర్చిపోలేని ఒక సమయముగా ఉంటుందని నేను నమ్ముతున్నాను. ఒక అత్యంత-ముఖ్యమైన వారాంతము.

మనము మన పరికరములన్నిటినీ ఆపివేసి మరియు లోకసంబంధమైన అంతరాయములన్నిటినీ ఆపివేయడం ద్వారా బయటి ప్రపంచమునకు మన తలుపులను మూసివేసి, మరియు మనం కేవలం మన జీవితములను మరలా ఆయనకు ప్రతిష్ఠించుకొనుచుండగా, ప్రతీ ఈస్టరు వధువునకు ఒక ప్రత్యేకమైన సమయముగా ఉండినది. మనము ప్రతి రోజు ఆయనతో మాట్లాడి, మరియు పిదప ఆయనయొక్క వాక్యమును వినుచుండగా, అది ఆయనకు ప్రతిష్ఠించబడిన ఒక వారాంతమైయున్నది.

శత్రువు మన జీవితములలో ఎంతో అంతరాయమును కలుగజేసాడు మరియు జీవితములోని అనేక విషయాలతో తీరికలేకుండా చేసాడు ఎంతగా అంటే అసలు లోకమును పూర్తిగా ప్రక్కన పెట్టి ఆయనతో మాట్లాడటం ఎంతో కష్టంగా మారిపోయినది. చివరికి వాక్యమును వినడానికి మనము ఉపయోగిస్తున్న పరికరాలను సైతం, సాతానుడు మన సమయమును వృధా చేయడానికి ఉపయోగిస్తాడు.

అయితే ఈ వారాంతము భిన్నముగాను, మరియు మనము ముందెన్నడూ కలిగిలేనటువంటి ఈస్టరు వారాంతముగాను ఉంటుంది.

ముద్రలు వినాలని ప్రభువు నా హృదయములో పెట్టినప్పుడు, తేదీలు ఎలా వస్తాయి అనేదాని గురించి నాకు కొంచెమైనా అవగాహన లేదు. అయితే ఎప్పటిలాగానే, ఆయనయొక్క సమయము పరిపూర్ణమైనది. రెండు ఆదివారముల క్రితం, ప్రవక్తగారి పుట్టినరోజైనట్టి, 6వ తేదీన, పక్షిరాజు కాలమైనట్టి, 4వ ముద్రను వినే భాగ్యమును మనము కలిగియున్నాము; అది ఎంత సముచితంగా ఉన్నది కదా.

అయితే ఇప్పుడు, ప్రభువు మన కొరకు ఇంకా ఎక్కువ కలిగియున్నాడు. నేను చెప్పినట్లుగా, ముద్రలను ప్లే చేయమని ప్రభువు నా హృదయంలో పెట్టినప్పుడు, ఆ శీర్షికలో 10 వర్తమానములు ఉన్నాయి గనుక వాటిని వినడం పూర్తి చేయుటకు అనేక వారములు పడుతుందని నేను ఎరిగియున్నాను.

నేను క్యాలెండరు వైపు చూడగా, మనము ఆ శీర్షికయంతటినీ వినడం పూర్తి చేయడానికిముందే ఈస్టరు వస్తుందని నేను చూసాను. మనము ముద్రలను వినడం ఆపవలసియుంటుందేమో మరియు ఈస్టరు కొరకు ఆయన నాకు వర్తమానములను ఇస్తాడేమో అని, నాలో నేను అనుకున్నాను.

ఒక్క క్షణములోనే…అది పరిపూర్ణముగా ఉంటుందని నేను చూసాను. ఈస్టరు ఆదివారపు ఉదయమున ఏడవ ముద్ర ప్లే చేయబడుతుండే విధంగా మనము ముద్రలను ప్లే చేయడం కొనసాగించవచ్చును. నేను దానిని నమ్మలేకపోయాను, అది ప్రణాళికలో పరిపూర్ణముగా సరిపోయినది. సరిగ్గా అప్పుడే, ప్రభువా, ఇది నీవే అని నేను తెలుసుకున్నాను.

ఒకరితోనొకరము, మరియు ఆయనతోను కలిసి మనము కలిగియుండే మన ఈస్టరు సమయము కొరకు నేను ఎంతో ఉత్సాహభరితుడనయ్యాను మరియు గొప్ప ఎదురుచూపుతో ఉన్నాను. ఆయనే మన కొరకు ప్రణాళికను తయారు చేసాడని నాకు తెలుసు.

అందునుబట్టి, ప్రభువు చిత్తమైనయెడల, మనము మన ప్రత్యేకమైన ఈస్టరు వారాంతముగుండా ముద్రలను వినడం కొనసాగిస్తాము.

గురువారము

ఇశ్రాయేలు పిల్లలయొక్క నిర్గమమునకు ముందు జరిగినట్టి పస్కాకు జ్ఞాపకార్థముగా, ప్రభువైన యేసు తన శిశువులతో కలిసి ఆఖరి భోజనమును చేసినది గురువారము రాత్రియైయున్నది. మన పవిత్రమైన వారాంతమునకు ముందు, మనము మన గృహములలో ప్రభువుతో ప్రభురాత్రి భోజనమును కలిగియుండి, మన పాపములను క్షమించమని, మరియు మన ప్రయాణములో మనకు అవసరమైయున్న సమస్తమును మనకు అనుగ్రహించమని కోరడానికి మనము ఎటువంటి అవకాశమును కలిగియున్నాము కదా.

మనందరము సహవాసము 62-0204 అను వర్తమానమును వినడానికి, మీ స్థానిక కాలమానం ప్రకారంగా సాయంత్రం 6:00 P.M గంటల సమయమప్పుడు ప్రారంభించుదాము, మరియు పిదప ప్రవక్తగారు మనల్ని మనయొక్క ప్రత్యేకమైన ప్రభురాత్రి భోజనము మరియు పాద పరిచర్యలోనికి మనల్ని నడిపిస్తారు, అది లైఫ్ లైన్ యాప్ లో (ఆంగ్లములో) ప్లే చేయబడుతుంది, లేదా క్రింద ఇవ్వబడిన లింకును నొక్కడం ద్వారా మీరు ఆంగ్లములోనైనా లేదా ఇతర భాషలలోనైనా ఆ కూడికను డౌన్లోడ్ చేసుకోవచ్చును.

వర్తమానము తర్వాత, మనము మన గృహములలో మన కుటుంబాలతో కూడుకొని మరియు ప్రభువు భోజనమును తీసుకుంటాము.

శుక్రవారము

మనల్ని మనము ఆయనకు ప్రతిష్ఠించుకొనుచుండగా మనతో ఉండమని మరియు మన కుటుంబాలను పరిశుద్ధాత్మతో నింపమని ప్రభువును ఆహ్వానిస్తూ మనము ఉదయం 9:00 A.M. గంటల సమయమప్పుడు, మరియు పిదప మరలా మధ్యాహ్నం 12:00 P.M. గంటల సమయమప్పుడు, మన కుటుంబాలతో కలిసి ప్రార్థనలోనికి ప్రవేశించుదాము.

మన మనస్సులు, సుమారు 2000 సంవత్సరాల క్రితం, కల్వరి వద్ద జరిగిన ఆ దినముయొద్దకు వెళ్ళి మరియు మన రక్షకుడు సిలువపై వ్రేలాడుటను చూచును గాక, మరియు పిదప అదే విధంగా ఎల్లప్పుడూ తండ్రికి ఇష్టమైనదానినే చేయడానికి మనల్ని మనము సమర్పించుకొందుము గాక:

పిదప మధ్యాహ్నం 12:30 P.M. గంటల సమయమప్పుడు, దీనిని వినడానికి మనము మన గృహములలో కూడుకుందాము: 63-0323 ఆరవ ముద్ర.

పిదప కూటము ముగిసిన వెంటనే, మన ప్రభువుయొక్క సిలువ మరణమునకు జ్ఞాపకార్థముగా మనము ప్రార్థనలో మరలా కూడుకుందాము.

శనివారము

మరొకసారి మనమందరము ఉదయం 9:00 A.M. గంటల సమయమప్పుడు మరియు మధ్యాహ్నం 12:00 P.M. గంటల సమయమప్పుడు ప్రార్థనలో కూడుకొని, మరియు ఆయన మన కొరకు మన మధ్యన చేయనైయున్న గొప్ప కార్యముల కొరకు మన హృదయములను సిద్ధపరచుకుందాము.

పిదప మధ్యాహ్నం 12:30 P.M. గంటల సమయమప్పుడు, వాక్యమును వినడానికి మనమందరము కూడుకుంటాము: 63-0324m ముద్రల మీద ప్రశ్నలు మరియు జవాబులు.

ప్రపంచ వ్యాప్తంగానున్న ఆయనయొక్క వధువునకు ఇది ఎటువంటి ఒక అత్యంత-ముఖ్యమైన దినముగా ఉండబోవుచున్నది కదా.

పిదప కూటము ముగిసిన వెంటనే మనము తిరిగి ప్రార్థనలో కూడుకుందాము.

ఆదివారము

ఆయనయొక్క చిన్న స్నేహితుడైన, రాబిన్ పక్షి, ఉదయం 5:00 A.M. గంటల సమయానికి ఆయనను మేల్కొల్పినప్పుడు, సహోదరుడు బ్రెన్హామ్ గారు లేచినట్లే మనము కూడా మొదట తెల్లవారుజామునే మేల్కొందాము. యేసును మృతులలోనుండి లేపినందుకు మనము కేవలం ప్రభువునకు కృతఙ్ఞతలు చెల్లించుదాము:

ఉదయం 9:00 A.M. గంటల సమయమప్పుడు మరియు మధ్యాహ్నం 12:00 P.M. గంటల సమయమప్పుడు, మనము మరలా మన ప్రార్థన గొలుసులో కూడుకొని, ఒకరి కొరకు ఒకరము ప్రార్థించుకుంటూ మరియు దేవునియొక్క స్వరమును వినడానికి మనల్ని మనము సిద్ధపరచుకుందాము.

మధ్యాహ్నం 12:30 P.M. గంటల సమయమప్పుడు, మన ఈస్టరు వర్తమానమును వినడానికి మనము కూడుకుంటాము: 63-0324e ఏడవ ముద్ర.

మధ్యాహ్నం 3:00 P.M. గంటల సమయమప్పుడు, మనము మరలా ఒకసారి ప్రార్థనలో ఐక్యమై, ఆయనతోను మరియు ప్రపంచ వ్యాప్తంగానున్న ఆయనయొక్క వధువుతోను ఆయన మనకు అనుగ్రహించిన అద్భుతమైన వారాంతము కొరకై ఆయనకు కృతఙ్ఞతలు చెల్లించుదాము.

విదేశాలలో ఉన్న నా సహోదరీ సహోదరులకు చెప్తున్నాను, గడచిన సంవత్సరము వలెనే, ఈ ప్రణాళికలో ఉన్న ప్రార్థనా సమయములన్నిటికీ జఫర్సన్విల్ కాలమానం ప్రకారంగా, మాతో ఐక్యమవ్వడానికి మిమ్మల్ని ఆహ్వానించుటకు నేను ఇష్టపడుచున్నాను. ఏది ఏమైనను, గురువారము, శుక్రవారము, మరియు శనివారము మధ్యాహ్నము జఫర్సన్విల్ కాలమానం ప్రకారంగా టేపులను ప్లే చేయడం మీలో చాలా మందికి ఎంతో కష్టమని, నేను గ్రహిస్తున్నాను, కావున దయచేసి మీకు అనుకూలమైన సమయములో ఆ వర్తమానములను ప్లే చేసుకోడానికి సంకోచించకండి. ఎలాగైనను, కలిసి మన ఆదివారపు వర్తమానమును వినడానికి, ఆదివారము మాత్రం జఫర్సన్విల్ కాలమానం ప్రకారంగా, మధ్యాహ్నం 12:30 P.M. గంటల సమయమప్పుడు, మనమందరము ఏకముగా కూడుకోవాలని నేను కోరతాను.

క్రియేషన్స్ ప్రాజెక్టులు, జర్నలింగ్, మరియు యంగ్ ఫౌండేషన్ క్విజ్ లలో కూడా మీరు మరియు మీ పిల్లలు పాలిభాగస్థులవ్వాలని మిమ్మల్ని ఆహ్వానించుటకు నేను ఇష్టపడుచున్నాను, వాటిని మీ కుంటుంబమంతా కలిసి ఆనందించవచ్చును. అవన్నియు ఈ వారాంతములో మనము వినే వాక్యము మీదనే ఆధారపడియున్నవి గనుక మీరు వాటిని ఇష్టపడతారని మేము అనుకుంటున్నాము.

వారాంతపు ప్రణాళిక కొరకు, ప్రభురాత్రి భోజనమునకు సిద్ధపరచుకొనుటకై కావలసిన సమాచారము కొరకు, క్రియేషన్స్ ప్రాజెక్టులకై అవసరమయ్యే పదార్థముల కొరకు, ఈస్టర్ క్విజ్ లు, మరియు ఇతర సమాచారము కొరకు, క్రింద ఇవ్వబడిన లింకులను చూడండి.

ఫోటోలు తీసుకోడానికి, ఈ దినమునకు కొటేషన్ ను వినడానికి, ద టేబుల్ యాప్ నుండి, లైఫ్ లైన్ యాప్ నుండి, లేదా డౌన్లోడు చేసుకోగల లింకు నుండి టేపులను వినడానికి తప్ప మిగతావాటన్నిటికీ మన ఫోనులను ఆపివేసుకుందాము.

ఆరాధనతో, స్తుతులతో మరియు స్వస్థతతో నిండిన ఒక వారాంతము కొరకు ప్రపంచ వ్యాప్తంగానున్న వధువుతో కూడివచ్చుటకు మిమ్మల్ని మరియు మీ కుటుంబమును ఆహ్వానించడం నాకు ఒక గొప్ప భాగ్యమైయున్నది. ఇది నిజముగా మీ జీవితమును ఎప్పటికీ మార్చివేసేటటువంటి ఒక వారాంతమైయున్నదని నేను నమ్ముచున్నాను.

సహోదరుడు జోసఫ్ బ్రెన్హామ్