Sun Apr 26, 2020 10:00 AM EDT
அன்புள்ள தேவனுடைய தன்மைகளே,
இந்த நாளுக்காக வாக்குத்தத்தம் செய்யப்பட்ட தேவனுடைய வெளிப்பட்ட வார்த்தையாய் நீங்கள் இருக்கிறீர்கள். நீங்கள் எப்போதும் இருந்தீர்கள். நீங்கள் இருக்கப்போகிறவர்கள் அல்ல, ஆனால் இப்போதே நீங்கள் தேவனுடைய குமாரர்களாகவும் குமாரத்திகளாகவும் இருக்கிறீர்கள்; ஏனெனில், இரக்கத்தில் ஐசுவரியமுள்ள தேவன், ஆரம்பத்திலிருந்தே உங்களைத் தம்முடைய சிந்தனையில் கொண்டிருந்தார்.
அவர் பூமியிலே எந்த ஒரு பொருளையும் உருவாக்குவதற்கு முன்பே, அல்லது எதுவும் இருப்பதற்கு முன்பே, நீங்கள் அவருடைய தன்மைகளில் ஒருவராக இருந்தீர்கள். உங்கள் பெயர் என்னவாக இருக்கும் என்பதை அவர் அறிந்திருந்தார். உங்கள் தலைமுடியின் நிறம் என்னவாக இருக்கும் என்பதையும் அவர் அறிந்திருந்தார். உங்களைப் பற்றிய அனைத்தையும் அவர் அறிந்திருந்தார்.
பின்னர், அவருடைய சத்தம் உங்களுக்கு முன்பாக ஒலித்ததைக் கேட்டபோது, உங்களுக்குள் ஏதோ ஒன்று சத்தமிட்டது; நீங்கள் எங்கிருந்து வந்தீர்கள் என்பது உங்களுக்குத் தெரியும், எனவே நீங்கள் அதனன்டை வந்தீர்கள். அதுவே சத்தியம் என்பதை நீங்கள் அறிந்திருந்தீர்கள். அந்த வித்து எப்பொழுதுமே உங்களுக்குள் இருந்த காரணத்தால் அதுவே இன்றைய நாளுக்கான தேவனால் அருளப்பட்ட வழி என்பதையும் நீங்கள் அறிந்திருந்தீர்கள்.
அவர் இப்பொழுது நம்மை கழுகுகளின் செட்டைகளில் சுமந்து செல்கிறார். அவர் எப்பொழுதுமே தீர்க்கதரிசிகளை கழுகுகளுக்கு ஒப்பிடுவதாக வார்த்தை நமக்கு சொல்கிறது. வில்லியம் மரியன் பிரான்ஹாம் இந்த நாளுக்காகத் தேவனுடைய ரூபகாரப்படுத்தப்பட்ட கழுகு செய்தியாளராய் இருக்கிறார். வாக்குத்தத்தம் பண்ணப்பட்ட தேசத்திற்கு நாம் சுமந்து செல்லப்பட வேண்டியது அந்த கழுகுகளின் செட்டைகளில்தான், ஏனெனில் அவரே, தேவனுடைய கழுகு தீர்க்கதரிசியாய் தேவனுடைய செய்தியைச் சுமந்து, அதை அறிவித்து, அவருடைய வார்த்தையைப் பேசி, அவருடைய மணவாட்டியைப் பரிபூரணப்படுத்துகிறார்.
நாம் வில்லியம் மரியன் பிரான்ஹாமை அவருடைய விடுதலையின் செய்தியோடு பின்பற்றும்போது நாம் தேவனைப் பின்பற்றிப் கொண்டிருக்கிறோம். வேதாகமம், "...அவர்கள் விசுவாசியாதவர்களோடு அழிந்துபோகவில்லை" என்று கூறியுள்ளது. ஏனெனில் அவர்கள் அவருடைய கட்டளைகளைப் பின்பற்றிக்கொண்டிருந்ததால், தேவன் அவர்களுக்கு இரக்கத்தில் ஐஸ்வரியமுள்ளவராயிருந்தார்.
தேவன் நாம் அவருடைய கட்டளைகளைப் பின்பற்ற வேண்டும் என்று விரும்புகிறார்; அவருடைய கட்டளைகள் கூறியுள்ளதாவது: "நான் உங்களுக்குத் தேவனுடைய சத்தமாக இருக்கிறேன். அந்த ஒலிநாடாக்களில் உள்ளவற்றை மட்டுமே சொல்லுங்கள். தவறாத வார்த்தைகளைப் பேசும் ஒரே சத்தம் என்னுடையதுதான். அது மிகச் சரியாகப் பேசப்பட்டுள்ளது, நீங்களும் அதை என் சத்தத்திலிருந்து மிகச் சரியாகப் பெற்றுக்கொள்கிறீர்கள். எனவே அந்த ஒலிநாடாக்களில் உள்ள தேவனுடைய சத்தம் மட்டுமே உங்களுக்குத் தேவை; ஏனெனில், இரக்கத்தில் ஐசுவரியமுள்ள தேவனாகிய நான் அதை உங்களுக்காக அருளியுள்ளேன். இதுவே இன்றைய நாளுக்காக நான் அருளியுள்ள வழியாகும்."
இரக்கத்தில் ஐஸ்வரியமுள்ள தேவன், அந்த வெளிப்பாட்டைப் பெறவும், அந்தச் சத்தத்தைக் கேட்கவும் உங்களைத் தெரிந்துகொண்டு முன்குறித்தார். இந்த கடைசிக்காலத்தில், மிக அதிக தவறான புரிதல்களும், அந்தச் செய்தி குறித்த பல்வேறு விதமான சத்தங்களும் வியாக்கியானங்களும் பெருகியிருக்கும்போது, அவருடைய மணவாட்டியிடம் அவர் சொல்ல விரும்பியதை வார்த்தைக்கு வார்த்தை நாமே நேரடியாகக் கேட்பதற்கு, ஒரு பரிபூரணமான சத்தமும் பரிபூரணமான வழியும் நமக்குத் தேவைப்பட்டது என்பதை இரக்கத்தில் ஐஸ்வரியமுள்ள தேவன் அறிந்திருந்தார்.
மற்றவர்கள் சொன்னதை மட்டும் நீங்கள் எடுத்துக்கொள்ள முடியாது; தேவன் கூறினதைத்தான் நீங்கள் ஏற்றுக்கொள்ள வேண்டும். அவர், "ஒவ்வொரு மனிதனின் வார்த்தையும் பொய்யாக இருக்கட்டும், என்னுடையதே சத்தியமாக இருக்கட்டும்" என்று கூறினார்.
ஆகவே, இரக்கத்தில் ஐஸ்வரியமுள்ள தேவன், அவருடைய மணவாட்டி அவருடைய சத்தத்தை வருடத்தின் 365 நாட்களும், 24 மணி நேரமும் இயங்கு பொத்தானை அழுத்திக் கேட்பதன் மூலமும், தேவனுடைய சத்தம் தங்களுடைய இருதயங்களில் நேரடியாகப் பேசப்படுவதைக் கேட்டு உயிர்ப்பிக்கப்படவும் ஒரு வழியை அருளியுள்ளார்.
நாம் மாம்சமான அவருடைய வார்த்தையாக இருக்கிறோம். நமக்கு எந்த வல்லமையும் இல்லை, ஆனால் அவர் நமக்குத் தம்முடைய அதிகாரத்தை அளித்துள்ளார். நம் ஒவ்வொருவரிடமும் அந்த அதிகாரம் உள்ளது. அதை நீங்கள் மறுத்தால், நீங்கள் இருக்கும் நிலையிலேயே தங்கிவிடுவீர்கள். ஆனால் அதை நாம் ஏற்றுக்கொண்டால், அது அளவற்ற நன்மைகளைச் செய்யும்; ஏனெனில் தேவன் இரக்கத்தில் ஐசுவரியமுள்ளவர்.
ஒரு புருஷனோ அல்லது ஒரு ஸ்திரீயோ, நீங்கள் எந்த நிலையில் இருந்தாலும் நான் கவலைப்படவில்லை, ஒரு வாக்குத்தத்தத்தின் மூலம் தேவனுடைய அதிகாரத்தை நீங்கள் பெற்றுள்ளீர்கள், ஏனெனில் அவர் ஐசுவரியமுள்ளவர் மற்றும் அளவற்ற காரியங்களைச் செய்வதாக வாக்களித்தார். "இந்த மலையைப் பார்த்து 'தள்ளுண்டு போ' என்று சொல்லி, உங்கள் இருதயத்தில் சந்தேகப்படாமல் இருந்தால், நீங்கள் கூறியுள்ளது நடக்கும் என்று விசுவாசித்தால், நீங்கள் கூறியுள்ளதை நீங்கள் பெற்றுக்கொள்ள முடியும்.” நீங்கள் எந்த வல்லமையையும் பெற்றிருக்கவில்லை, ஆனால் நீங்கள் அதிகாரத்தை பெற்றுள்ளீர்கள்.
இந்நாளுக்காக அளிக்கப்பட்ட அவருடைய பரிபூரணமான வார்த்தையாகிய அவருடைய சத்தத்தைக் கேட்பதன் மூலம் மாத்திரமே மணவாட்டி பரிபூரணப்படவும், ஐக்கியப்படவும் முடியும். மணவாட்டியை ஐக்கியப்படுத்தவும் பரிபூரணப்படுத்தவும் கூடிய ஒரே சத்தம் அதுதான். நாம் கேட்டுப் பின்பற்ற வேண்டும் என்று தேவன் நமக்குச் சொன்ன ஒரே சத்தம் அது மாத்திரமே. மோசேயைப் போலவே, வாக்குத்தத்தம் பண்ணப்பட்ட தேசத்திற்கு நம்மை, அதாவது பிள்ளைகளாகிய நம்மை அழைத்துச் செல்லத் தெரிந்து கொள்ளப்பட்டவர் அவர்தான் என்பது பிரான்ஹாமிற்குத் தெரியும்; ஏனெனில் அந்த வாக்குத்தத்தம் அவருக்கே வழங்கப்பட்டிருந்தது. அவரே நம்மை அந்த வாக்குத்தத்தம் பண்ணப்பட்ட தேசத்திற்குக் கொண்டு செல்ல வேண்டியிருந்தது.
நம்முடைய கழுகுத் தீர்க்கதரிசி மாதிரிகளில் நமக்குப் போதித்தார். பழைய ஏற்பாடு என்பது புதிய ஏற்பாட்டிற்கு ஒரு நிழலாக இருந்தது. இந்த கடைசிக்காலத்தில் நாம் எவ்வளவு கவனமாக இருக்க வேண்டும் என்பதையும், எவற்றையெல்லாம் கவனிக்க வேண்டும் என்பதையும் அவர் நமக்குச் சொன்னார். கோராகின் ஆவியை குறித்தும், தாத்தானைக் குறித்தும், அவர்கள் போலியாகச் செயல்பட முயன்ற அவிசுவாசிகளின் கூட்டத்தைக் குறித்தும் அவர் நமக்கு எச்சரிக்கை விடுத்தார்; அவர்கள் தேவனுடைய திட்டத்தில் தங்களது சொந்த காரியங்களைப் புகுத்த முயன்றனர்.
ஒரு- மனிதனின் திட்டத்தை அவர்கள் விரும்பவில்லை; அது அவர்களுக்குப் பிடிக்கவில்லை. தாங்களும் ஏதேனும் ஒரு பணியைச் செய்ய வேண்டும் என்று அவர்கள் விரும்பினர். கோரா, "மோசே, உன்னைவிடப் பரிசுத்தமான மனிதர்கள் பலர் இங்கே இருக்கிறார்களே. கடற்கரையில் உள்ள ஒரே…கடற்கரையில் உள்ள ஒரு கூழாங்கல் நீ மாத்திரமே என்பது போல நீ நடந்துகொள்கிறாயே" என்றான். மேலும் அவன், "நான் -நான்…நீ அப்படிச் செய்யக்கூடாது; இங்கே இன்னும் பல மனிதர்கள் இருக்கிறார்கள்," என்றும் கூறினான்.
சகோதர சகோதரிகளே, இந்த காரியங்களைச் சொல்வதாலும் மேற்கோள் காட்டுவதாலும் நான் சபைகளைப் பிரிக்க முயற்சித்துக்கொண்டிருக்கவில்லை, பரிசுத்த ஆவியானவரே அந்தப் பிரிவினையைச் செய்து கொண்டிருக்கிறார். நாம் கேட்கப்போகும் இந்தச் செய்தியைக் கேளுங்கள். மணவாட்டியின் காரியத்தைக் குறித்து எச்சரிக்கையாக இருக்க வேண்டியதை அந்தத் தீர்க்கதரிசியே எச்சரிக்கிறார். அந்த ஆவியானவர் அப்போது என்ன செய்தார், நம்முடைய காலத்தில் மீண்டும் என்ன செய்வார் என்பதை அவர் நமக்குச் சொல்லிக் கொண்டிருக்கிறார்.
உண்மையாகவே, நான் மக்களை ஐந்துவகையான ஊழியத்தை சுற்றி அணிதிரட்ட முயற்சித்துக்கொண்டிருக்கவில்லை, அவர்களால் மணவாட்டியை கண்டிப்பாக ஒன்றிணைக்க முடியாது. மணவாட்டியை ஒன்றிணைக்கக்கூடிய ஒரே சத்தமான, தூய்மையான, கலப்படமற்ற தேவனுடைய வார்த்தையைச் சுற்றி அவர்களை ஒன்றிணைக்கவே நான் முயற்சித்துக் கொண்டிருக்கிறேன்.
இன்றும் நாம் அதே காரியங்களைக் கேட்கிறோம், அதாவது, சகோதரன் பிரான்ஹாம் மட்டுமே செய்தியைப் பிரசங்கிக்கக்கூடியவர் அல்ல, நாம் செய்தியைப் பிரசங்கிக்க அழைக்கப்பட்டிருக்கிறோம். உண்மையாகவே அவர்கள் அழைக்கப்பட்டிருக்கிறார்கள், ஆனால் அப்போதிருந்ததைப் போலவே, தங்கள் சபைகளில் தேவனுடைய சத்தத்தை ஒலிக்க விடாமல் இருப்பதற்கும், தங்கள் ஊழியத்திற்கு அதிக முக்கியத்துவம் கொடுப்பதற்கும் சாக்குப்போக்குகளைச் சொல்வதன் மூலம், அந்த சத்தத்தைக் கேட்பதைக் குறித்தும், இது ஒரே ஒரு மனிதனின் செய்தி என்பதை விசுவாசிப்பதன் முக்கியத்துவத்தை அவர்கள் உணரத் தவறுகிறார்கள்.
வேதம், ”இவர்கள் பிலேயாமினுடைய வழியில் நடந்து, கோரா எதிர்த்துப் பேசின பாவத்திற்குள்ளாகி, கெட்டுப்போனார்கள்'' என்று கூறியுள்ளது. கோரா எதிர்த்துப் பேசின பாவத்திற்குள்ளாகி அழிந்து போனார்கள். கோரா என்ன எதிர்த்துப் பேசினான்? ”ஏன், நீ ஒருவன் மாத்திரம் பரிசுத்த மனிதன் என்று எண்ணிக் கொண்டிருக்கிறாயா? ஏன், தேவனுடைய...நாங்கள் எல்லோருமே பரிசுத்தர். முழு சபையுமே சரியாயுள்ளது. ஒவ்வொரு... நாமெல்லாரும் ஒன்று சேர வேண்டும். அதை தான் நாம் செய்யவேண்டும்.'' அங்கே அவர்கள் அதனால் தான் அழிந்து போனார்கள். நாமும் உண்மையாகவே அதற்கு பாத்திரமாகிவிட்டோம். நாம் அவ்வாறு இருக்க பாத்திரமாகிவிட்டோம்.
இந்தச் செய்தி, அவருடைய சத்தம், தெளிவாகப் பேசப்பட்டு, மணவாட்டியால் தெளிவாக ஏற்றுக்கொள்ளப்படும் ஒரே சத்தமாகும். விசுவாசமுள்ள ஊழியம் என்பது, செய்தியைப் பிரசங்கிப்பதன் மூலமும் மேற்கோள் காட்டுவதன் மூலமும், மக்கள் அந்தக் சத்தத்துடன் நிலைத்திருக்க அவர்களை ஊக்குவிப்பதாகும். ஆனால் அதை வெறுமனே பிரசங்கிப்பது மட்டுமல்ல, அவர்கள் அதைத் தங்கள் சபைகளில் ஒலிபரப்ப வேண்டும், மேலும் மணவாட்டியால் தேவனுடைய சத்தத்தை, தேவனிடமிருந்தே கேட்கும்படி, அதுவே மிக முக்கியமான சத்தம் என்று தங்கள் மக்களுக்குச் சொல்ல வேண்டும்.
தேவனுடைய சத்தத்தைக் கேட்பதைவிட மேலானது எதுவும் இல்லை. ஒலிநாடாக்களில் உள்ள அபிஷேகத்தைவிட மேலான அபிஷேகம் எதுவும் இல்லை. ஒலிநாடாக்களில் உள்ள தேவனுடைய சத்தத்தைத் தவிர, மணவாட்டியை ஒன்றுசேர்க்க வேறு வழி இல்லை. நீங்கள் கேட்கும் ஒவ்வொரு வார்த்தையையும் இயங்கு பொத்தானை அழுத்திக் கேட்டு விசுவாசிப்பதைத் தவிர, வேறு எந்த பரிபூரண வழியும் இல்லை. இதுவே உண்மையிலேயே தேவன் தம்முடைய மணவாட்டி மீது இரக்கத்தில் ஐசுவரியமுள்ளவராயிருப்பதாகும். இதுவே இன்றைய நாளுக்காக அவர் அருளின பரிபூரண வழி.
இந்த ஞாயிற்றுக்கிழமை பிற்பகல் 12:00 மணிக்கு, ஜெஃபர்சன்வில் நேரப்படி, தேவன் பேசுவதையும், 65-0119 இரக்கத்தில் ஐஸ்வரியமுள்ள தேவன் என்ற செய்தியை கொண்டு வருவதன் மூலம் தம்முடைய பிள்ளைகளுக்குப் பரிபூரண வார்த்தையைக் கற்பிப்பதையும் நாங்கள் கேட்கப்போகிறபடியால், நம்முடைய நாளின் மகத்தான அபிஷேகத்தின் கீழ் ஒன்றிணைக்கப்பட நான் உங்களை அழைக்கிறேன்.
சகோ. ஜோசப் பிரான்ஹாம்
வாசிக்க வேண்டிய வேதப்பகுதி: எபேசியர் 2:1-5