அன்புள்ள இராஜ்யத்தின் சக பிரஜைகளே,

இந்த ஈஸ்டர் மணவாட்டிக்கு இதுவரை எப்போதும் இருந்து வந்ததிலேயே மகத்தான ஈஸ்டராக இருக்கும் என்று வாக்களிக்கிறது. நாம் குமாரனின் பிரசன்னத்தில் அமர்ந்திருந்து, முதிர்ச்சியடைந்து, நாம் யார் என்பதை அடையாளங் கண்டு கொள்கிறோம். அவருடைய வார்த்தையும், அவருடைய சத்தமும், கழுகு கழுகுக்கு உரக்கக் சத்தமிட்டு, நம்மை நமது கலியாண விருந்துக்கு அழைக்கிறபோது, இயேசு கிறிஸ்துவின் பரிபூரணம் நம் ஒவ்வொருவருக்குள்ளும் வெளிப்படுத்தப்படுகிறது.

ஒவ்வொரு ஆண்டும் இந்த நேரத்தில், மணவாட்டி வரவிருக்கும் ஈஸ்டர் வார இறுதியை மிகுந்த எதிர்பார்ப்புடன் எதிர்பார்க்கிறாள். அவர் உயிர்த்தெழுந்து நம் ஒவ்வொருவருக்குள்ளும் ஜீவித்துக் கொண்டிருப்பதால், அவர் உலகெங்கிலும் உள்ள நம்மை நான்கு நாட்கள் தொடர்ச்சியாக ஒன்றிணைத்து, அவரை ஆராதிக்கவும், அவருக்கு நன்றி செலுத்தவும், அவரைத் துதிக்கவும் செய்வார். மணவாளனும் மணவாட்டியும் ஒன்றாக ஆகிறார்கள்.

நம்மைச் சுற்றியுள்ள உலக காரியங்கள் அனைத்தையும் ஒதுக்கிவிட்டு, அவருடன் மட்டும் நேரத்தைச் செலவிட அவர் இந்த விசேஷமான நேரத்தை நமக்குத் அளித்துக் கொண்டிருக்கிறார். அவருடன் நமக்கென ஒரு உலகத்தை உருவாக்கும்போது, இவ்வுலகின் கவனச்சிதறல்கள் எதுவும் வேண்டாம். நம்முடைய கதவுகளை மூடி, நம் மின்னணு சாதனங்கள் அனைத்தையும், அவரிடமிருந்து நம்முடைய கவனத்தைத் திசை திருப்பும் எதையும் அணைத்துவிடுவோம்.

நம் ஒவ்வொருவருக்கும் இருக்கும் மிக மகத்தான வாஞ்சை, அவருக்கு இன்னும் நெருக்கமாக இருப்பதேயாகும். நாம் அவருக்காக இன்னும் அர்ப்பணிக்கப்பட்ட ஒரு வாழ்க்கையை வாழ விரும்புகிறோம்: எப்போதும் அவருடைய பரிபூரண சித்தத்தில் இருக்க விரும்புகிறோம். அவருடைய வருகைக்கு ஆயத்தமாக இருக்க விரும்புகிறோம். இந்த உலகத்திலோ, அல்லது நம்முடைய ஜீவியத்திலோ, இதைவிட முக்கியமானது ஒன்றுமில்லை.

அவருடன் நேரத்தை செலவிடவும், அவருடன் பேசவும், அவர் பேரில் தியானிக்கவும் அவர் நமக்கு இந்த விசேஷமான சந்தர்ப்பத்தை அளித்துள்ளார். அவருடைய பிரசன்னத்தில் பிரவேசிக்க, நம்முடைய இருதயங்களை அவருக்குத் திறக்க வேண்டும். இது அவருடைய மணவாட்டியின் ஜீவியத்தை மாற்றுமே!

குழந்தைகள், குடும்பம் மற்றும் பிற கடமைகளுடன் உங்களில் சிலருக்கு இது கடினமாக இருக்கலாம் என்பதை அவர் அறிவார், ஆனால், நமக்குக் கிடைக்கும் ஒவ்வொரு ஓய்வு வினாடியையும் அவருடன் பேசவும், அவருக்கு இன்னும் நெருக்கமாக வரவும், நம்முடைய இருதயங்களை அவருக்குத் திறக்கவும் நாம் பயன்படுத்தினால், நாம் முன்பிருந்ததைப் போல ஒருபோதும் இல்லாமலிருக்குமளவிற்கு, அவருடனான நம்முடைய சஞ்சரிப்பில் ஒரு பெரிய மாற்றம் ஏற்படும்.

மோசேயின் நாளில், அவர் தம்முடைய பிள்ளைகளை அவர்களுடைய வீடுகளுக்குள் கொண்டு வந்தபோது, இரத்தம் பூசப்பட்டு, அவர்கள் தங்கள் யாத்திரைக்கு ஆயத்தமாகிக் கொண்டிருந்தது போல, அவர் ஆயத்தப்படுத்தியிருக்கும் இந்த விசேஷமான ஈஸ்டர் வார இறுதியும் நம் ஒவ்வொருவருக்கும் இருக்கும்.

வியாழக்கிழமை

இஸ்ரவேல் புத்திரர் வெளியேறுவதற்கு முன்பு, பாஸ்கா பண்டிகையை நினைவுகூரும் விதமாக, கர்த்தராகிய இயேசு தம்முடைய சீடர்களுடன் கடைசி இராப்போஜனத்தை வியாழக்கிழமை இரவு உண்டார். நமது புனிதமான வார இறுதிக்கு முன்பு, நம்முடைய வீடுகளில் கர்த்தருடன் ஐக்கியமாகி, நம்முடைய பாவங்களை மன்னிக்கும்படியும், நமது பயணத்தில் நமக்குத் தேவையான அனைத்தையும் தரும்படியும் அவரிடம் கேட்க நமக்கு எவ்வளவு பெரிய வாய்ப்பு கிடைத்திருக்கிறது!

நாம் அனைவரும் மாலை 6:00 மணிக்குத் துவங்கி, உங்கள் உள்ளூர் நேர மண்டலத்தில் இராப்போஜனம் 62-0204-என்ற செய்தியைக் கேட்போமாக, பின்னர் அந்த ஒலிநாடாவின் முடிவிலே, தீர்க்கதரிசி நம்மை நமது விசேஷ இராப்போஜனத்திலிருந்து மற்றும் பாதங்களைக் கழுவும் ஆராதனைக்குள் அழைத்துச் செல்வார். இந்த ஆராதனை லைஃப்லைன் செயலியில் (ஆங்கிலத்தில்) ஒலிபரப்பப்படும், அல்லது கீழே உள்ள இணைப்பைக் கிளிக் செய்வதன் மூலம் நீங்கள் இந்த ஆராதனையை ஆங்கிலம் அல்லது பிற மொழிகளில் பதிவிறக்கம் செய்துகொள்ளலாம்.

வெள்ளிக்கிழமை

நாம் காலை 9:00 மணிக்கும், பின்னர் மீண்டும் மதியம் 12:00 மணிக்கும் நம்முடைய குடும்பங்களுடன் ஜெபத்திற்குச் செல்வோமாக. நாம் நம்மை அவருக்கு அர்ப்பணிக்கும்போது, கர்த்தர் நம்முடன் இருந்து, பரிசுத்த ஆவியானவரால் நம் வீடுகளை நிரப்பும்படி அவரை அழைப்போம்.

2000 ஆண்டுகளுக்கு முன்பு, கல்வாரியில் நடந்த அந்த நாளுக்கு நம்முடைய சிந்தனைகள் திரும்பிச் சென்று, நம்முடைய இரட்சகர் சிலுவையில் தொங்குவதைக் காண்போமாக. நமக்காக அவர் செலுத்திய மகத்தான கிரயத்தை நாம் நினைவுகூருவோமாக. அவர் பாவமற்ற தேவனுடைய குமாரனாக இருந்தார், ஆனால் வேறு எந்த மனிதனும் அனுபவிக்க முடியாத அளவுக்கு அவர் துன்பப்பட வேண்டியிருந்தது, ஏனென்றால் நம்முடைய பாவங்கள் அவர்மேல் சுமத்தப்பட்டன.

பின்னர் மதியம் 12:30 மணிக்கு, நம்முடைய வீடுகளில் நாம் ஒன்றுகூடி, 57-0419 பரிபூரணம் என்ற செய்தியைக் கேட்போமாக.

பின்னர், ஆராதனை முடிந்தவுடன், நம் கர்த்தருடைய சிலுவையேற்றத்தை நினைவுகூரும் விதமாக, நாம் அனைவரும் மீண்டும் ஜெபத்தில் ஒன்றுகூடுவோமாக.

சனிக்கிழமை

காலை 9:00 மணிக்கும் மதியம் 12:00 மணிக்கும் நாம் அனைவரும் மீண்டும் ஜெபத்தில் ஒன்றுகூடுவோமாக, மேலும் நம் மத்தியில் அவர் நமக்காகச் செய்யப்போகும் மகத்தான காரியங்களுக்காக நம்முடைய இருதயங்களைத் ஆயத்தப்படுத்துவோமாக.

பின்னர் மதியம் 12:30 மணிக்கு, நாம் அனைவரும் ஒன்றுகூடி 57-0420 கல்லறையிலிடுதல் என்ற செய்தியின் வார்த்தையைக் கேட்போமாக.

உலகெங்கிலும் உள்ள அவருடைய மணவாட்டிக்கு இது எவ்வளவு ஒரு மறக்க முடியாத முக்கிய நாளாக அமையப்போகிறது.

பின்னர், ஆராதனை முடிந்தவுடன் நாம் மீண்டும் ஜெபத்தில் இணைவோமாக.

ஞாயிறு

சகோதரன் பிரான்ஹாமின் சிறிய நண்பனான ராபின் பறவை, அதிகாலை 5:00 மணிக்கு அவரை எழுப்பியபோது, அவர் அதிகாலையில் எழுந்தது போல, நாமும் முதலில் அதிகாலையில் எழுவோமாக. இயேசுவை மரித்தோரிலிருந்து எழுப்பியதற்காக கர்த்தருக்கு நன்றி செலுத்துவோமாக:

காலை 9:00 மணிக்கு, நாம் மீண்டும் நம்முடைய சங்கிலி ஜெபத்தில் இணைந்து, ஒருவருக்கொருவர் ஜெபித்து, தேவனுடைய சத்தத்தைக் கேட்க நம்மை ஆயத்தப்படுத்திக் கொள்வோமாக.

காலை 9:30 மணிக்கு, 65-0418M இது சூரிய உதயம் என்ற நம்முடைய ஈஸ்டர் செய்தியைக் கேட்க நாம் ஒன்றுகூடுவோமாக.

மதியம் 12:00 மணிக்கு உயிர்ப்பிக்கும் வல்லமைக்காக அவருக்கு நன்றி செலுத்தி, நாம் நம்முடைய சத்தங்களை அவரிடம் உயர்த்துவோமாக.

மாலை 3:00 மணிக்குஅவரோடும், உலகம் முழுவதும் உள்ள அவருடைய மணவாட்டியோடும் அவர் நமக்கு அளித்த இந்த அற்புதமான வார இறுதிக்காக அவருக்கு நன்றி செலுத்தி, நாம் மீண்டும் ஒருமுறை ஜெபத்தில் இணைவோம்.

வெளிநாட்டில் உள்ள என் சகோதர சகோதரிகளே, கடந்த ஆண்டைப் போலவே, இந்த அட்டவணையில் உள்ள அனைத்து ஜெப நேரங்களிலும் ஜெபர்சன்வில் நேரப்படி எங்களுடன் இணைய உங்களை அழைக்க விரும்புகிறேன். இருப்பினும், வியாழன், வெள்ளி மற்றும் சனிக்கிழமை மதியம் ஜெபர்சன்வில் நேரப்படி ஒலிநாடாக்களை இயக்குவது உங்களில் பலருக்கு மிகவும் கடினமாக இருக்கும் என்பதை நான் உணர்கிறேன், எனவே உங்களுக்கு வசதியான நேரத்தில் அந்தச் செய்திகளை இயக்க தயங்க வேண்டாம். இருப்பினும், ஞாயிற்றுக்கிழமை காலை 9:30 மணிக்கு, ஜெபர்சன்வில் நேரப்படி, நமது ஞாயிறு செய்தியை ஒன்றாகக் கேட்க நாம் அனைவரும் ஒன்று சேர விரும்புகிறேன்.

மேலும், உங்கள் முழு குடும்பமும் ஒன்றாக அனுபவிக்கக்கூடிய படைப்புகள் திட்டங்கள், நாட்குறிப்பு எழுதுதல் மற்றும் சமையல் குறிப்புகளில் நீங்களும் உங்கள் பிள்ளைகளும் பங்கேற்க உங்களை அழைக்க விரும்புகிறேன். அவை யாவும் இந்த வார இறுதியில் நாம் கேட்கப்போகும் வார்த்தையை அடிப்படையாகக் கொண்டிருப்பதால், நீங்கள் அவற்றை விரும்புவீர்கள் என்று நாங்கள் நம்புகிறோம்.

வார இறுதி நிகழ்ச்சி நிரல், இராப்போஜன ஆராதனைக்குத் தயாராவதற்கான தகவல்கள், படைப்புகளின் திட்டங்களுக்குத் தேவையான பொருட்கள் மற்றும் பிற தகவல்களுக்கு, கீழே உள்ள இணைப்புகளைப் பார்க்கவும்.

புகைப்படங்கள் எடுப்பதற்கும், அனுதின மேற்கோளைக் கேட்பதற்கும், செய்தித் தொகுப்பு என்ற டேபிள் செயலி, லைஃப்லைன் செயலி அல்லது பதிவிறக்கக்கூடிய இணைப்பிலிருந்து ஒலிநாடாக்களை இயக்குவதற்கும் தவிர, ஈஸ்டர் வார இறுதியில் நமது தொலைபேசிகளை அணைத்து வைப்போம்.

உலகெங்கிலும் உள்ள மணவாட்டியின் துணையுடன், ஆராதனை, துதி மற்றும் சுகமளித்தல் நிறைந்த ஒரு வார இறுதிக்காக உங்களையும் உங்கள் குடும்பத்தினரையும் ஒன்றுகூட அழைப்பது எனக்குப் பெரும் பாக்கியமாகும். இது உங்கள் ஜீவியத்தை என்றென்றும் மாற்றும் ஒரு வார இறுதி என்று நான் உறுதியாக நம்புகிறேன்.

சகோதரன் ஜோசப் பிரான்ஹாம்